لي الشرف ان اقف امام قامات شامخة من كبار الشعر الشعبي ورواد الابوذيه. لقد جمعت هذه المساجله من صفحة الشاعر الكبير ابو جلال الحواسي. وكما يلي
كتب الشاعر المبدع والمتألق دائما الحاج حسين خليل الجهلاوي هذا البيت
***********************
گمت اسمع دوي بحشاي لاهين
علل وادواهن الدكتور،،،،لاهين،
الوج الليل كله اوهلي،،، لاهين،
اولحد الغرغره ايهزون بيه،
**********************
وكان جواب ابو جلال الحواسي له مايلي:
عليه يابهن وكتي ولمهن
علل تتمنى لليكره ولمهن
عد غيري مهن كثره ولمهن
غير الصدگ ماعندي هويه
واجابه ايضا عدنان الجابري
يذب وكتي عليه علل. ويلام
وماضنه يطيب الجرح . ويلام
اعذره المادره يحسين ..... ويلام
شبصرك بالدره ويلوم بيه
واجابه ايضا ابو حيدر العيساوي العيساوي
واجابه ايضا ابورائد الطعان العبيدي
لا هوني ولا هناك ولا هين
اللوج اوربعي مو يمي ولاهين
انه المنهان من طبعي ولاهين
انهنت من يوم وكتي خان بيه
واجابه ايضا عدنان الجابري
طحت بالبير مامن فزع . منتال
اديه وعود ردت ارتاح .... منتال
يالهي بس الك شكواي .... منتا
لگلت رزقك يعبدي بين اديه
واجابه ايضا مهندس علي عبدالجبار الشموسي
افك طلسم وتطلعلي مسائل
بعشرتك يل علي نوبة مسائل
مسى الماشم شذى شناغك مسى ال
حزن والكدر حد جيتك عليه.1
يون كلبي علشوفك وانتلاهي
وردت تكطعها كلش ونته الاهي
لاهي بيوم تسبط ونته لاهي
اخر ونه واترجى المنية
قلمي2...
بطراجيعه الدهر هدنا وهنه
وريح شامتي وسرره وهنه
مغرض شامت عربضي وهنه
علي صاروا ولا گالوا خطية
واجابه ايضا الشاعر هاشم الشغانبي
گمت اســــمع ربد بحشاي ودواي
وصديجي مشعــله بالگلب ودواي
الغيري ايمرض عنده ادواه ودواي
ك طير ودگ جنــــــــح يم الثريه
واجاب ايضا. سيد عباس العكده
گمت أسمع صريچ عظام وعظام
بسبب شدتي تخلف أشد وعظام
أسبحلك يرب الكون وعظام
شجنيت وكل هلي يگطعون بيه
.. سيد عباس العكده الموسوي..
واجاب ايضا. محسن السعداوي السعداوي
بديت وماعرفت اشلون بدواي
وأنه حتى الطبيب احتار بدواي
يحالي اليوم يشبه حال بدواي
غريب او نزل ابذيج الثنيه
واجاب ايضا. مالك السرحان
تلعثم من نظر حالي يرحروف
طبيبي وكلت مالك يرحروف
منو مثلي حلم عنده يرحروف
خبز من كَد عسر دنياي بيّه
واجاب ايضا. رعد فؤاد مطشر المطشر
بحجـر ومثلم وجاسـي يحزناي
الشامت لـو نظر حالي يحزناي
ابوني الوادم امهـيعــه يحزناي
يطـرب ليل المودعــات بيـّه
مهيعة من الهجوع
تعني النوم المتقطع
واجاب ايضا. ابو غزوان المالكي
وحك الفرض والقبله والاذان
النوايب ختلن ابكلبي والاذان
يصاحب ركن اعيوني ولاذان
دبي النمله أسير على الوطيه
واجاب الشاعر ناجي الماجدي
نحل يرتع وسط روحي دوي الهه.
عليله ولا چوي يرهم دوه الهه.
عليه الوسعه من ضاگت دولهه.
يم گبر الحبيب تهود هيه
واجاب الشاعر قاسم السعيدي
صـدى الذكراكم براسي .... دوالها
صحت وبعلتي إحتارت .... دوالها
غريبه وما أظن يحصل .... دوالها
الهـوا لــو مـر تطــگ ضلــوع بيــه
الشاعر قاسم السعيدي
گطــع مانفــع بيـه ونــي ،، وناحاي
تنـام عيـون كـل فاجــد ،،، وناحاي
اليصد ميت يظن حالي ،،، وناحاي
البسـوس وعملـة أُم جســاس بيـه
......قاسم السعيدي .......
مظلمه ديار طيب الذات -*- وحشاي
غيابه إشعل جمر بالروح -*- وحشاي
أظن صوب دليلي برمـح -*- وحشاي
وتــرك حــزن وقهــر يعگـــوب بيـــه
......... قاسم السعيدي ...........
اجاب الشاعر عبدالستار العلي
ذوت روحي بعد مامش شفله
ابعدت يالتمري بگربك شوفله
كبرت لاتظن بعدك شفله
افل وحده تشد للطول بيه
*********
بنمه ريعي گصه وكتي وحشني
هارف ليل غطاني وحشني
ولا مره گلت شخصك وحشني
ونه نبعي عليك يفيض ميه
عبدالستار العلي
اجاب ابو جراح العامري
بحشاي المصايب حيل يردان ....
على ثوبج بالج اطولين يردان....
اليالي السود بية نوب يردان....
ايلطمن لطمت المفكود اخية؟؟؟
ابو جراح
الوكت حتى على ثوبي جاسماني
و انة الجنت بزماني جاسماني
عدوي كض تفگتي جاسماني
رمه وحط تهمت المكتول بيه
ابو جراح
العواذل ليش عمده يرهبونه
غصب ذيج الشوارب يرهبونه
من اجة لروحي خذاها يرهبونه
وصريخ عيال هاشم صار بيه
ابو جراح
انه وي الما يلين وياي مالين
مو بس مال الك وديت مالين
اذا خصمي عليك شروط مالين
على الله انتكل لا تحتار بيه
ابو جراح
يلاهي العمر خلصته بسلهم
كلشي مابقة بگلبي بسلهم
عنب ماشفت لساعه بسلهم
انه المتهوم راس المال اليه
ابو جراح
شعجب ديران اهلنه هايمني
العگل غفلة بسببكم هايمني
و علي كل المصايب هايمني
من ايدي ومايدج الريش الية
ابو جراح
اراهم دوم لكن مايروني
اعطشت والماي يمهم مايروني
طحت وحبابي يمي مايروني
بخباثة وگاموا يغرگون بيه
ابو جراح
الحزن مگدار ويروحي لهافيت
دوت بجفاك نيراني لهافيت
مثل لهفة طفل لمه لهافيت
بعجاله وركضت طويريج بيه
ابو جراح
واجابه
اكابر ويه دهري نوبة لاوي
لذيذ التمر برحي نوبة لاوي
طحت شمعون ذبني مدري لاوي
مثل يعقوب ماظل شوف بية
قلمي الشاعر العميد سعد
واجابه الشاعر عبدالستار العلي
اكابر وي دهري ونهرنه
وتظل روحي بحسرتي ونه رنه
جنت تفتح سواجي ونهرنه
شعجب شحيت من وزك عليه
اكابر وي دهري ونهرنه
وتظل روحي بحسرتي ونه رنه
جنت تفتح سواجي ونهرنه
شعجب شحيت من وزك عليه
عبدالستار العلي
واجاب الاستاذ قاسم السعيدي
على الطيبين أهل دمعي ••• وأربعين
بگربكــم تزهـــر ديـــاري ••• وأربعين
سبعــة مـن العمــر عـدن ••• وأربعين
وهواكــم يستجــد كــل يـــوم بيـــ
وايضا قال
شبيــه العــاج خــده ،،، من أشافه
عسـل مـو ماي ينبــع ،،، من أشافه
غشاوه تصيب عيني ،،، من اشافه
أهومـــش والزغـــار تگـــود بيـــه
اجاب الشاعر عبدالستار العلي
ادفنت سري ابير اظلم لمن شاف
احاوت ينسگي منه لمن شاف
اعطب وجوي بجرحي لمن شاف
ولايدري عذول وشمت بيه
بفراگنه العمر گوطر وجرهن
صاح وفزز جروحي وجرهن
احملت لاجلك مصايبهن وجورهن
طلعت مثل التبن من تحت ميه
عبدالستار العلي
مقدم البرنامج
علي حنون العامري
تعليقات