الى...أمي...رحمها الله
الشاعر ستار دفار
آنه وانتي
شكد ضحكنه
اعله الوكت من دار بينه **
شكد حلمنه
اباجر الجايب الفرحه
وجاي لينه **
شكد رسمنه احلام.
بوجوه اليتم
وآمال بالواهس بنينه **
شكد قسه ويانه الزمن
بس ماحجينه**
شكد عتبنه اعله الشمس
من جنتي يم المطحنه تبسطين عوز
وتلمّين البقه بجيسيّة ركَبتج للطحينه**
ورغم عوزج
بس تدورين النريده
وتشترينه**
جنتي كعبه
ومن نطوف عليج
وتلمنه عباتج
نرجع محملات ادينه**
مات ابونه
وثكلت وجوه الكَبل تضحك ويانه
وصارت الوادم غثيثة وموحنينه**
وانتي ماعابيتي واحد
وكلتي كلمن ملتهي بضيم الوكت
والمايمر تسامحينه**
يامره بعشرين زلمه
جان وكتج
بي زلم رفعت الرايه
ولعذابات الزمن صارو رهينه**
وانتي صبرج زينبي
وزودج جنوبي
وبزغر عين اليغثج تاخذينه**
واكفه بوجه الزمن
وبليلج تنامين
بس عينج علينه**
ومن اجه الطوفان عوز
ثار صبرج
وانتفض خلكج سفينه**
يمه.....
صار الوكت بعدج
مدري شنهي
لاطعم لالون لاجلمة محنه التحتوينه**
والله بين اطفالنه وغربتنه غربه
لاكو ضحكه من الكلب
لافرح خاطر
جذّب الكّلج تعودنه ونسينه
تعليقات