تعال وشوف
جروح الهجر تدري وإياي نفس الطول
ولك موسم وجعهن يتعب الناسوف
وشم دخانهن مو يخنگ الشعواط
عتگ من يعطبن مثل حرگ الصوف
ما بطل نزفهن راهيات إهواي
أضمدهن إبصبري. ما نفعهن روف
وشدهن بالونين وملة الچانون
ورچد روحي گوه وشماته إشوف
تعال وشوف
لا جية ربيع يطف خريف إجفاك
عفت روحي خرابه ونام بيها الخوف
ولا خنياب يطفح يروي گاع الشوگ
ولا دبرت مردي يدفع المشحوف
صرت إسنين يوسف تاكل المضموم
وحصدت العمر منجل متعب الگاطوف
ولا مريت غيمه تبشر الناثور
وترش سنبل العشره وتجبر المعروف
تعال وشوف
ليش إصير عثره ودرب ما مسحوگ
وتفشل العروس وتطرد الزافوف
ليش إصير مشعل تحرج البستان
وشردت الحمام وبالحماد يطوف
ليش إصير حصوه وتارس المحچال
وتغني شماته الفرة الهافوف
ليش إصير حوته وتفك حلگ الليل
وتفشل گمرنه وبگت خلگ الشوف
تعال وشوف
شحلات الدنيا لو صارت ورد ونجوم
وتنام الحبايب والأماني طيوف
شحلات السهر والوادم أغاني وكيف
كلها إدوف حنه والصفگ ودفوف
شحلات النوم والگمره وهوه الرسريس
لا واحد يدلي ولا حرامي إيحوف
شحلات الوكت من تضحك محنه وطيب
ويضحك وجه الغبشه وتحچي عالمكشوف
تعال وشوف
تعال وشوف
الشاعر
فيصل الطفيلي
تعليقات